اللقاء الحصري مع الشيخ/علي بن حسين آل مجدل الخالدي

يسرني بالغ السرور ان انقل لكم المقابلة الحصرية التي اجراها الاستاذ. سعــــــــد بن مطلق البويــــــــدي الخالدي للشيخ/ علي بن حسين المجدل الخالدي.

الشيخ /علي بن حسين بن علي آل مجدل الخالدي

اللقاء الحصري لمنتدى بني خالد الرسمي مع الشيخ // علي بن حسين المجدل الخالدي
ضمن لقاءات المنتدى الرسمي لقبيلة بنى خالد مع شيوخ وأعيان القبيلة كان لقاءنا اليوم غير و مع شخصية غير، لقاءنا مع شيخ من شيوخ بنى خالد ورمز من رموز القبيلة لقاءنا مع رجل متواضع جداً رجل طيب القلب أخاً للكبير وأباً للصغير رجل عاصر القديم والجديد ضيفنا هو الشيخ .علي بن حسين بن علي المجدل الخالدي حفظه الله.
ضيفنا أبو نهار مع الأخ سعد بن مطلق البويدي حيث كان هذا الحوار المميز.

في بداية حديثنا يابونهار نرحب بك في بداية اللقاء وشاكرين لك تلبية الدعوه.
ياهلا ومرحبا وحياكم الله وأبرك الساعات.

البطاقه الشخصية ؟
الاسم :علي بن حسين بن علي بن حسين بن حمد بن مجدل بن درباس بن مانع بن حمد بن مجدل الخالدي .
مكان الميلاد : جزيرة جنــــَه تاريخ الميلاد : 1346.

كم كان عمرك يابو نهـار عندما تزوجت ؟
كان عمري 16 سنه.

وكم من النساء تزوجت ؟
تزوجت أثنتان ، ولدي من الابناء 9 وهم : نهار ( المتوفى)، عبدالعزيز ، سعود ، حمد ، فيصل ، محمد ، حسين ( متوفى)، مجدل ، مشرف ( متوفى) .

وين درست وتعلمت قراءة القرأن الكريم يابو نهار ؟

حفظت بعض من سور القران الكريم في جزيرة جنـــَه على يد الشيخ عبداللطيف بن مطيَر رحمه الله .

من المشايخ الذين قامو بتعليم القران الكريم في جزيرة جنـــَه ؟

الشيخ مطير ومن ثم ابنه الشيخ عبداللطيف ومن ثم ابنه الشيخ عبدالرحمن ومن ثم ابنه الشيخ راشد ومن ثم جانا مطوع من اهل نجد اسمه ابن عوشن .

مازال الكثير من ابناء القبيله يتذكر بمزيد من الفخر والاعتزاز موقفكم النبيل في العفو تجاه قضية ابنكم المرحوم وتنازلكم بدون مقابل لوجه الله تعالى , هل لك ان تحدثنا عن مساعي العفو والاصلاح التي حصلت واستقبالكم لمشائخ قبيلة مطير ومن معهم من شيوخ القبايل ؟

الموقف النبيل

اولاَ الحمد والشكر لله على كل حال العفو تم لوجهه سبحانه راجين الجزاء من عنده ومن عفا واصفح فأجره على الله , ومن ثم تقديراً لجاه مشائخ القبائل ومن من حضر من مشائخ قبيلة مطير وعلى رأسهم الشيخ : فيصل بن بندر الدويش . ومشائخ القبائل الأخرى وهم : الشيخ فيصل بن سلطان بن حميد والشيخ فيحان بن تركي بن ربيعان والشيخ ناصر بن حمود بن شافي والشيخ فراج بن محمد بن مطر أبو اثنين والشيخ فيصل بن عجمي بن سويط والشيخ عبدالله بن فيصل بن سحوب والشيخ ناصر بن هزاع بن خليل بن قرملة والشيخ محمد بن سلطان بن خليل بن قرملة والشيخ سلمان بن مران بن قويد والشيخ خلف بن سلطان بن قويد والشيخ ضاري بن محمد بن طوالة .
وعند حضورهم كنا في أستقبالهم حنا ياالمجــدل ومشائخ بني خالد ورحبنا فيهم وتكلمت أنا وقلت ياالدويش حنا مصابنا عظيم وحملنا كبير وأنت ذا الحين جبت لنا حمل ثاني هم شيوخ هالقبايل وكلن له حق وأنا متنازل لوجه الله وثم تقدير لجاه الرجال , ولكن لي شرط وقالي وشهو شرطك قلت شرطي أن الجاني مايطــب المنطقه , وعطيناهم والحمدلله على كل حال وكان للشيخ : فهد بن عجران العجران الدور الكبير بتنسيــق لحل القضيـــة .

مارأيك في ضاهرة المبالغه في طلب مبالغ ماليه طائله للٌديـــه ؟
الديه حق وأفضل منها التنازل لوجه الله سبحانه وكسب العلم الغانم .

متى بداءت المقناص يابو نهار ووين كنتو تقنصون من أول؟
بدات المقناص وأنا صغير السن,وكنا نقنص على الأقدام والركايب قبل معرفة السيارات, وبعدها قنصت مع الشيخ عبدالله بن عيسى ال خليفه لعدة سنوات وكان عمري وقتها تقريباً 22 سنه وباقي مقانيصي مع ربعنا مابين جنة والزور والنقورية والسوده والحيدانيه والحبل , وكان الصيد وفير وكانو الصقاقير قله ماهوب كثرة هالوقت.

بخصوص المقناص اول والمقناص في وقتنا الحالي يابو نهار ما الفرق بينهم؟ .
الفرق بينهم كبير ,المقناص من اول ماتعود الا والعلقه مليانه حباري وارانب ,وفي وقتنا الحالي الصيد قليل والسبب كثرة الصقاقير وقلة الصيد .

ودنا تحدثنا عن الطيور وانواعها يابو نهار؟ 

 فيها حر وفيها شاهين وفيها وكري ..
والشياهين فيها : نادر ،  لزيز ، محقوره ، وتبعه.
والحرار : فيها ، نادر ، لزيز ، مثلوث ، ربع.
المواكر .. ايران وباكستان هذا اللي نعرفه من اول ..
واللي يجي من ايران اطيب من اللي يجي من باكستان.

والمواكر في الساحل الشرقي عندنا ..
الجزيرة ، ابو علي ، الزور ، ام صفيحه ، والعموده
واللي يعبر عندنا اكثر شي الشياهين .. والحرار قله .. والوكري مايجي عندنا.

وعن أمراض الطيور ماذا تعرف عنها ؟
الرداد : يجي بخشم الطير . وعلاجه الكي فوق الخشم . او مسمار يحمى على النار وينقف فيه الحبه عشان يتوسع الخشم .
السده : تجي بكف اليد . وعلاجها ، صبر ، او حنا ، او قرف رمان  ويمكن تسلم ويمكن ماتسلم .
النهيته : تجي باالرئه ، وهذي مالها علاج .
القلاع : يجي مثل القطن في حلق الطير ، وعلاجه ، سكين حاده يحك فيها السان الطير ويذر عليه ملح كانه برا ويحميها من الطيب عشان الشمم .
وفي وقتنا الحالي يوجد لها حبوب خاصه بها .

وهذي القصيدة من اللي انا حافظه على ضياع الطير وماني عارف قايلها :

يـاهـل الونـيـت يـامـال السـلامـه***دورو عـــبـــاث والا حــولــونــي
برمي الملواح في راس العدامـه***وبفضي اللي كان كانيتـه عيونـي
طيري اللي ماغـدا يطـرد حمامـه***ضاع يامشكاي مع برقٍ عزومي

قصيدة الشيخ علي بن حسين المجدل على الشيخ حمد بن درباس المجدل في جزيرة جنَــــه :

ضيفنا مع الشيخ/سليمان بن صقر والشيخ مجدل بن درباس في جزيرة جنَه

ياحـمـد ديــرة الـجــدان مـشـهـوره***جدنـا مـن عصـور التـرك حاميـهـا
يـوم وقـت الحرايـب حامـيٍ سـوره***ويوم صار الرخى الكل طامعٍ فيهـا
حاميـه مـن سـبـاع الـبـر وبـحـوره***ديــــرة الــجــد مــــاوالله نـخـلـيـهـا
جـدنــا سـيّـسـه ومـبـنّـي قــصــوره***ومن عصور الصحابه ساكن ٍ فيها
ديـرةٍ مـن علـى الجـدان مـسـروره***نلطـم الشـره والـلـي كــان يبغيـهـا
يوم صار الأمان وحكـم اخـو نـوره***ديـــرة الـجــد كـــل ٍ يـدعــي فـيـهـا

وهذه مرثيه لشيخ علي بن حسين الخالدي في المرحوم الشيخ حمد بن درباس:
يقول ابو نهار:

يـاسـعـود نـاولـنـي مـــع الـحـبــر قــرطــاس***واكـتــب كــــلام(ن) قـايـلــه مــــن فــــؤادي
الله يـبـيــحــك يــاحــمــد يـــابـــن دربــــــاس***ذكـــرك ظـهــر بـيــن الـحـضــر والــبــوادي
فــي جـنـة الـفـردوس فــي ظــل الاغـــراس***ومـسـكـنــك بـالـجـنــه نــســيــم الـــبـــرادي
اول شــبــابــه مــامــشــى درب الادنــــــاس***ولـــه مـجـلـس(ن) للـضـيـف دايـــم يـنــادي
شيخ(ن)ولدشيخ(ن)شيوخ(ن)على ساس***ولاجــــا  الـمـلاقــا يـلـطـمـون الـمــعــادي
وكـــــل الـقـبــايــل دون حـــقـــه وفــــــراس***يـــروون حــــد الـسـيــف يــــوم الــطــرادي
واليوم  جا  وقت(ن) علـى النـاس حسـاس***قـــام الـثـعــل لـلـذيــب كــــل يــــوم عــــادي
وراع الدراهـم صـار شـيـخ(ن) ولــه نــاس***ومــن اول(ن) يمـشـي مــع الـنـاس عــادي
واخـتـامـهـا واعـــــداد مــاهـــب نـســنــاس***عـلــى الـنـبـي المـخـتـار قـــدوى الـعـبــادي

وهذي الابيات لبو نهار بعد :

الله مــن وقــتٍ يشـيـب بـورعــان***اشـوف ولـد البـوم صايـر نــداوي
ولـد الـردي يـارى بنفسـه بليهـان***ومن اولٍ يرقد مـن الجـوع ثـاوي
والله لولا الخوف من طير حوران***كان الضواري طوعت كـل غـاوي

باالنسبه لشعراء بني خالد اهل المنطقه من تتذكر منهم ؟
مسلط بن عصمان ، علي الذراع ، سعد القاطع ، سعيد الحويط ، ناصر بن زقم ، راضي الحسين ، ابن شخبوط ، حمود نهار المروت ، حبيب الدليهي ، ابن داهن ،ابن دوخي ، مطلق البلود ، ابن سحيب ، وغيرهم الكثير من شعراء بني خالد.

يابو نهــار نريد منك بعض من ما تحفظ من القصائد التي قيلــت في حروب بني خالد باالمنطقـــه ؟
القصـــائد التي قيلت كثيره وهذي  قصيدة القريوي العجمي وكان مع بني خالد في كون مريخ :

يالله انـــــــك لاتـخـلـيــنــا***ياعظيـم الـشـان ياكـافـي
جــدنــا الاول مـوصـيـنــا***قـال لاترضـون باالهافـي
ويــل مــن نــولاه بيـديـنـا***لاقضبنـا حـدب الاسيافـي
 والمـيـازر فــي يمانـيـنـا***وام نص خشاب ورهافِي
لادعـانــا شيـخـنـا جـيـنــا***جمعنـا باالكـون يتشافـي
قـاعـد النـهـديـن ناخـيـنـا***نـاخـذ الـعـدات باالـوافـي
ليـت راشـد حـاضـر فيـنـا***اقتضيـنـا فـيــه بسـنـافـي
والمـعـادى مــن يمانيـنـا***زاملينـه فــوق موجـافـي

والقصيدة الثانيه للقريوي أيضاً:

يالله لامــن جـيـنـا اهـلـنـا***يـالـلاش مانـثـنـي عـلـيـه
نثني على اللي يوم سرنـا***والقـرم سـلـم لــي علـيـه
يالبـيـض يالـلـي تعشـقـنـا***مــــن ذل قــــول مـانـبـيـه
شوم(ن) لشغموم(ن) تثنا***والــذل مـايـطـري عـلـيـه
ضيـدان جانـا عنـد اهلـنـا***ماهـو بـمـا جــوب علـيـه
دوك المعـادي مـن طعـنـا***طير الهـوى يكسـر عليـه
ياسعود وان سايلـت عنـا***حقـك وحــن زدنــا علـيـه
حـنـا هــل الـعـادات حـنــا***عــدونــا نــوطــى عـلـيــه
مـن غـاب عـنـا ماشحـنـا***هـــذاك مـانـبـكـي عـلـيــه

وهذي القصيدة للقريوي العجمي يوم مريخ:

يــاالله انــي طالـبـك يـارقـيـب***خيـراً كــل الـمـلا فــي رجــاه
والقريـوي قـال قـولٍ عجـيـب***مـن ضميـرة قايـلـه مـاشـراه
هيضه باالليل ياحمود ذيـب1***بايـتـن لـيـلـه تـبـاطـا عـشــاه
فوق جال مريخ شرق القليب***فوق جال مريـخ يشهـد جبـاه
فـي نهـارٍ قـام يـزهـم شبـيـب***وحربـيٍ للجمـع يــز الصـغـاه
والمعـادي شـاف يـومٍ يشيـب***ذا جزى له يوم خـان صحبـاه

وهذي القصيدة لشاعر مسلط بن عصمان:

المشـقـى بـــدا فـــي راس مـابـانـي***يبـدع الـقـاف فــي عـالـي مراقيـبـه
يالله انــا طالـبـك ياعـالـي الـشـانـي***يـافـهـيـمِ وســــد الـغـيــب تـدريــبــه
عز ربعـي علـى مـن زارهـم عانـي***صـايـلٍ بالظـعـن والجـمـع يزمـيـبـه
يــوم جـونـا كـمــا دولات سلـطـانـي***مـثـل سـيـل تـحــدر مـــن محانـيـبـه
والتـقـوهـم نـهــار الـــورد خـلانــي***عـلـط الارقــاب نـحـالـن مقاضـيـبـه
يـوم جانـا يــدوث الجـمـع ضيـدانـي***زار اهـلــنــا بـخــلانــه وأجـانـيـبــه
وإلـتـقـوه الحـمـاقـه بـــام ســيــلاني***لابـتـي كسـبـت النـامـوس تحـريـبـه
كيـف ضـيـدان فيـنـا يقـطـع العـانـي***عقـب مـافـات هــذا الـلـي يجازيـبـه
مـاذكــر هـيــة الـوفــره بـالاكـوانـي***يــوم جتـنـا الشـلايـل مــع منـاديـبـه
حـن عطينـاه حـقـه يــوم جاءعـانـي***ليت من ينشـده عـن فعـل اصاحيبـه
جمـعـنـا لامـشــى مـاهــو بـخـوانـي***سـيـف هـنــدِ عطـيـبـاتِ مضـاريـبـه
مــن جـزانـا بطـيـبِ نـرجـعـه ثـانــي***نعـطـي الـحـق والمـعـروف نثنـيـبـه
سـاعـةِ واسـتـوى للـمـلـح دنـدانــي***حام طيـر الهـوا مـن صايـح الريبـه
واستـوى فـوق جـال العـد عكـلانـي***الـدخــن سـاكــبِ والـعــج يـومـيـبـه
كــم هـنـوفِ هـواهــا كـــل ديـقـانـي***عـقـب حجيـرهـا كـثــرت خواطـيـبـه
شـوقـهـا طـايــحِ لـلـخـيـل مـيـدانــي***تـوهـا مــع نـكـوف الـقـوم تـدريـبـه
تمحش الدمع من منقوش الاوجاني***عـقـب جــرحِ جـديـدِ فـاريــن جـيـبـه
كـان ذيــب الـردايـف بــات جيعـانـي***بـشــروا دار عـــدِ عــاويــن ذيــبــه
بـشــرو بالـعـشـا خـيــلِ وصـبـيـانـي***يـوم ســوق الـغـلا بـاعـوا جلاليـبـه
ذا جـوابـي عـلـى مايـلـفـظ لـسـانـي***زيــن قــولِ عـلــى حـلــه وترتـيـبـه

من هو معشي الطرفا يابو نهار وودنا نعرف وش قصة معشي الطرفا ؟
معشي الطرفا هو مناحي بن مشيري بن شحينه بن صقر بن مغامس بن عقاب الشاهين الخالدي .
وقصته:
مناحي عقب ماكبر في السن قل شوفه وكان ذاك في وقت الربيع ونازلين البـــر في ذاك اليوم وكان باالقرب منهم بعض من أشجار ( الطرفا ) وكان عنده واحد من عبيده اسمه مــبارك .
وزهم مناحي على مبارك وقاله العرب اللي نزلو عندنا رح اعزمهم على العشا , ومبارك يشوف انها طرفا بس مشتهي اللحم وقال ابشر ياعم وراح لهم وبعد ماجا قال ياعم عزمتهم وقالو سو العشا قاله مناحي اذبح الذبيحه وبعد ماجا عقب المغرب قال مناحي يامبارك وين الضيفان قال مبارك ياعم مامن ضيفان مامن الا طرفا انا اشتهيت اللحم وقلت اني عزمتهم ومامن غير الطرفا قال مناحي لمبارك تستاهل اللحم وكان معروف بكرمه ومن بعدها لقب بمعشــي الطرفا وهذي سالفتها .

طيب يابونهار ودنا تخبرنا بقصة ابن فارس والهاجري ؟
هذي قصتها كالتالي:
الحسن مودعين أبلهم مع العوازم أهل( ثـــاج ) ويوم جا اول الموسم وظهر سهيل راح الشيخ فارس و زمام و فهد الثواب و محمد الثواب وبعض جماعتهم من الحسن وذولا ابلهم يم( البـــتــيـل ) في طرف وادي المياه ومعهم الشيخ شبيب العقل وبعض ربعه ويجون ويمسون عند ( خريشيف )ويوم اصبحو قال فارس ياشبيب ماودك تروح معنا يم البتيل ناخذ ابلنا بعدين نروح ناخذ ابلكم قال شبيب انت ابلكم يم الوادي وحنا ابلنا يم السوده الا انتو روحو هاتو ابلكم وحنا بنورح يم ابلنا باالسوده وتفرقو من خريشيف . وراح فارس واللي معه يم البتيل يوم اقبلو على البتيل الا قدامهم ابل كثر ابلهم ومعها فرسان يحوفونه وقامو يتزاهمون ابلنا وخـــذت ياالربع ولحقون الخياله ( وتكاونون ) معهم ويتصوب فارس وتذبح فرسه وتذبح فرس ابن ثواب ويفكون الابل وبعد مافكوها وشافو الوسم الا هي ابل الهاجري ابن وسام وهذي سالفة ابن فارس والهاجري بعد مافكو ابله .

ماقصة الغزو ؟ وأبن عقـــــل يابو نهار ؟
على حياة الشيخ حماده العقــل الأول كان مقيض في ( قطنان ) وعنده واحد عتيبي يقاله العريدي وجواهم غزو واسالو واحد من الرعيان من اللي موجود قريب وقالهم الشيخ حماده قالوله محد حوله من ربعه قال لا حنا قيض وربعه جنوب, وكان العريدي كل فجر ياخذ البندق والمحزم من حماده ويطلع يقنص قبل طلوع الشمس و جا واحد من الغزو وصوت لحماده وطلب منه البندق والمحزم وناوله حماده البندق والمحزم يحسبه رفيقه العريدي وخذا الغازي البندق وقتل حماده وخذو الحلال ، وفي السنه اللي عقبها في القطيف قال الشيخ محمد العقل ياجماعه حنا نبي نروح عريب دار ( الظهران ) وكان في نيته البحث والاخذ بثأر وراح معه عبدالمحسن الخزر وثلاثه من الحويط ومحمد بن خثيله وبعض من ربعـــه وبالصدفه التقــو مع الغزاه اللي ذبحو حماده وكانو جايين من البحرين ( يتشرهون ) من الخليفه وصار رمي بينهم وهم مايدري انهم ذباحة حماده واذبحو الحنشل وهم اذبحو محمد ابن خثيله وخذا محمد بن عقل وجماعته القضى وحلال ( عريب دار ) ومشوا معوديين وبعد قليل لحقتهم أمرأة تصوت عليهم وتصيح قال محمد العقل وقفو وقفو وقالت وين ابن عقل منكم ، قال أنا محمد بن عقل قالت انا بشيره وابي البشاره قال ابشري باالبشاره قالت اللي ذبحتوهم تراهم جهمان واخوياه اللي ذبحو حماده , وقام ابن عقل وعود عليهم ولقا عندهم اوراق فيها اساميهم , وقال محمد تقدمي يامره على الحلال وشوفي وسمك ووسم اللي يعز عليك واخذيه وعقب مارجعو تاقسمو الحلال اللي بقى معهم وتهيض سعيد الحويط وقال هذه القصيدة :

يالله الـيـوم يامنـشـي المخـايـل***نـاثـر الغـيـث مــن نَــو رزيـــن
عـز ربـعـي عـلـى كــل القبـايـل***من حربهـم عسـى مالـه معيـن
مـن حربهـم يجـي نومـه ملايـل***ومـــن طلـبـنـاه ديـــنٍ لاحـقـيـن
لـيـت يامـحـمـدٍ عـيـنـك تـخـايـل***ساعـةٍ شفـت فعـل المستحـيـن
اقتضـوا فيـك عجلـيـن الكتـايـل***اقتضـوا فـيـك بجهـمـان بحـيـن
حن هل الخيـل محميـن الدبايـل***صـ ـلب جدى وهـم يتـم الجنيـن
 مرويـه باللقـا حــدب السـلايـل***يفهقـون الخديـن امـن الخـديـن
هيـه ياناقـضـة سـمـر الجـدايـل***الــــردي لا تـحـطـيـنـه ظـنــيــن
اعشق اللي حضر يوم الوهايل***يالطيف الحشـا صافـي الجبيـن

   

ودنا نتكلم يابو نهار عن مرابع بني خالد اهل المنطقه وعن بيوت بني خالد وأنواعها وماتتميز به ؟

بني خالد كانو منتشرين احداً يربع في الزور واحداَ باالسوده واحداَ باالنقوريه واحداً باالحبل ومنهم من يرتفع على حد قنور وباالقيـــض يحدرون كلهم عنــــــك هم وحلالهم والدق من الحلا ياخذونه معهم والحلال الكبار يودعونه .

الضيف مع سعد بن مطلق

ولاجا الصفري وظهر سهيل شدو وانزلو ورى النقا ( النقا غرب القطيف ) حتى يكتملون ويتوكلون على الله كلن ومرباعه ويلعب عليهم ان كان ماني زال هو ابن مهوس القحطاني او عيد بن خلف القحطاني:

نـجـوم الـصـفـاري بـيـنـت يـاهــل غـــران***ودونـك سهيـلٍ بالسمـاء يشـعـل اشـعـلاي
وعرشِ المقايض ضربوهن هل الشقحان***وشـالـو بـنـات الـبـدو مــع بـزهـا الغـالـي
ونـوو بالشديـد وبـرزو مـن ورى النقيـان***والاول تـهـيــد لــيــن يـلـحـقـهـم الـتــالــي
وحــلاة السـلـف لاقـادلـه بـأولــه حـنـيـان***وصـــم الـرمــك لاركـبـهـن كـــل عـيـالــي

ومتى كان وقت شديد بني خالد من عنك للبر ؟
مع ظهور سهيل وحنا ياالمجدل واللي معنا من ربعنا نروح لجزيرة جنـــــَه على الخشب عن طريق البحر وناخذ اول الصفري ولامن طاح المطر ظهرنا من جزيرة جنــــَه يم الزور اومنيفه أو بلبول أو النقوريه ..

مامناسبة قصيدة ابن فواز الدوسري اللي يقول فيها جاك سنجارنا بشرع من عالي ؟
بن فواز شاعر مع المجدل ومناسبة هذه القصيدة كانو المجدل وجماعتهم مقبلين على عنك بطارف دارين على الخشب جايين من جزيرة جنـَــه وقد كانو متأخرين في قدومهم تلك السنه لعـــنك وكان بني خالد كلهم نازلين عنـــك وتهيض ابن فواز وقام يلعب:

جاك سنجارنا باالشرع من عالي***شيفتـه ترهـب العـدوان بنـشـوره
وسطه الملح صوته لـه تزلزالـي***كـم عـدون وطينـا ونهـدم ســوره
دارنــا لايـغـرك لــو نـجـي تـالــي***حن هـل الـدار لاجينـا زهـا نـوره
شيخنـا مـثـل حــرٍ مـاكـره عـالـي***لاشهـر خـرت العقـبـان وطـيـوره

أما بيوت بني خالد وماذا تتميز به وماهي انواعها ؟
البيوت فيه مخموس ومروبع ومثولث وقطبين وقطاب ، واللي يسوون البيت من اول النسوان يتجمعون ويسوون البيت ، والخالدي مايجي البيت من قدام لا جا مسير يجي من خلاف البيت وهذا سلم عندنا ، واذا جيت البيت من اول عرفت الحرمه الجيده من الحرمه الرفله أذا شفت البيت اقطوبه واقفه ومسمت دريت ان راعيت البيت جيده ولا شفته مرتخي دريت انها رفله ماهي جيده والمجلس يكون من شرق ـ ومن اول مايعرفون الشاهي مغير قهوة وحليب وتمر ، والعرب من اول يتنازلون بيتين وثلاثه أو أربعه ويسمونهم نجع,ويسيرون على بعضهم البعض ، والخالدي مايحط عمد باالبيت مع الكسور أي مع أطراف البيت ويفصل البيت ببجاد,وتسمى ساحه أو ذرا .

وهذه الابيات للكحيلي في مرابع بني خالد :

لا درهـش بنيـان الشـراري علـى المعـدان*** يـسـوق الحـمـار ويرتـكـي فــوق شـومـيـه
ولازانت عنوق العشب في جو ابا الحيران*** تـلـقــا مثـالـيـثـن عــلــى الـطـيــب مـبـنـيـه
يـاعـلـه فـــداً لنجـعـنـا الـلــي ورد قـطـنـان ***لاهـبــت هـبــوب الـصـيــف ود الـنـقـوريـه

وهذي القصيدة لبن عصمان في مرباع بني خالد وشديدهم ، وماني حافظها كلها :

عز واليك يابرقٍ علـى الصلـب لاحـي***ارعــد الـنـو فـوقـه ستهـلـت مـزونـه
زين نبـت القـرار ومنزلـن باالفياحـي***وجعل حنا مـع اللـي زاهـره يقطفونـه
ساقت الابل بأهلها وابعدت باالمناحي***وصلتـهـم ديــارن ماهـقـو ياصـلـونـه
الردايـف وخيـمـه والامـشـه مـلاحـي***كيف نصبر على دار الجفا والمهونـه
احـداً شـد مشـمـل يــم دار الصبـاحـي***واحداً مـن ورى قريـه تقفـت ضعونـه
اقتفاهم خريمـص والقريشـي مناحـي***وصلـتـهـم ديـــارٍ مـاهـقـو ياصـلـونـه

هل صحيح يابو نهار مايذكرونه بأن بني خالد مالحقهم جوع مثل غيرهم ؟
نعم ما لحقهم جوع, لآنهم يملكون العديد من النخيل والبساتين في القطيف والأحساء وصفوى , وكانوا بالقرب من البحر وخير الله في البحر كثير وكان يطلق عليهم أهل الخضرتين, والحمد الله بنعمه وخير .

فيه ناس تسمي بني خالد الشرقيه وبني خالد الشمال وبني خالد نجد وكذالك ، انت وش رايك يابو نهار؟
انا اقول كل بني خالد واحد .

ودنا تحدثنا عن سلاح بني خالد سابقاً ؟

• (مقمع) واهل نجد يسمونه فتيل .

• الصمعا 

•  الميزر

•  وام تاج القصيرة 

•  وام تاج الطويله 

•  الشرفا

•  السواري 

•  العصملي

وماذا عن العملات سابقاً ؟
فرانسي حجر .. بعده جات الروبيه بعده جا الريال وفيه أأنه .. وأنتين .. وقرش وقرشين وبعدها جا الريال الورق .

ماهي القبائل التي كان لها علاقات مع بني خالد في المنطقه؟
هناك الكثير من القبائل التي لديها علاقات حلف وجيره مع بني خالد مثل بعض من العوازم والهواجر وقحطان والعجمان والدواسر وسبيع وشمر وعنزه ومطير والعداويين.

قصر مياله من هو له يابو نهـــار ؟
حسب ما سمعت أن قلعت مياله من اول للعسكر ومن تالي خذاها ابن سعود

وهل صحيح يقال بأن عنك حدودها من الساب للساب؟
نعم ,بأمر من الملك فيـــصل الله يرحمه والشاهد قصيدة الحويط عندما جاء امر من الملك بتثبيت أملاكهم في عنك وتحديد حدودها وهي من الساب الجنوبي الا الساب الشمالي ومن الغرب القار ومن الشرق البحر .

ومن قصيدة الحويط التالي :

قصر مياله

طرش المرسول قبل العدو والطامعين***قــال حدعـنـك مــن سـابـهـا لاسـابـهـا
وحدهامن شرق سيف البحرللطامعين***وحدهـامـن قـبـلـه رستةيـمـشـي بـهــا
ذي بلاد الخالـدي مـن عصورالأوليـن***يامهـنـدس ورثـــة الـجــد مايحكـابـهـا
المـسـاجـد ثـابـتـة والـمـنـازل بـيـنـيـن***وعين اخونورةعليهاواهلهاأولـي بهـا

هل بالقطيف أملاك سابقا لبني خالد؟
نعم سابقاً وما زالت , ومعظم نخيل القطيف من املاك بني خالد والحضر اللي في القطيف هم اللي يقومون برعاية هذه الاملاك .

وبخصوص شارع الخيل يابو نهار ليه سموه بهذا الاسم ؟
سموه بهذا الأسم لأن بني خالد كانو يتسابقون ويعرضون باالخيل كل عصريه من جنوب عنك لاشمالها باالمناسبات والاعياد .

وش علاج الامراض عندكم من اول يابو نهار؟
الحالول ( العشرج ) و الكي ..

ومن كان مشهور في العلاج سابقا في عنك ؟
براك محمد السكران السديري ..

أبو نهار ودنا تحدثنا عن الحج سابقاً؟
الحج كان .. على جيش (الأبل ) ومدته ثلاث شهور .. روحه وجيه
وكان الحجاج قله لما فيه من مشقه . وبعده جت السيارات والطرق كانت صحراويه وعره .
بنسبه للوقت الحالي الحمد الله والشكر والثناء له ونشكر حكومتنا على هذا الجهدالمبذول لخدمة بيت الله الحرام والحجاج .
ومراح الرياض من اول .. شهر .. بعد روحه وجيه على الجيش ( الأبل ).

هل غزو بني خالد من اول مع ابن سعود يابو نهار؟
نعم غزو سنــة جده وغزو سنـــة نجران وخذو في نجران سنه .

ماهو الموروث الشعبي لبني خالد اهل المنطقه من أول يابو نهار؟

• العرضــــه

• المجيلــــسي 

• الـــــــــــبداوي .

وماذا عن القــــلطــه  يابو نهـــار ؟
بني خالد ماهم اهل قلطه .
واللي اذكره ان القاطع لعب مع بن جافور العازمي ولاني قاضب من لعبتهم الا بيتين :

قال ابن جافور :

جمعنـا لاتزبـر مثـل جـمـر حـمـر***واعذابه عذاب اللي برجله وطاه

ورد القاطع :

جمركـم لاوطيتـه لازم انـه دمـر***لوأجيب الجراده جمركم مأشواه

ماذا تملك من الحلال يابو نهار في وقتنا الحالي ؟

أملك أبل و غنم .

ماهي أنواع الأبل التي تملك ؟

أملك مجـــــاهيـــم وضــــــــــــح.

في نهاية القاء نتقدم بجزيل الشكر والعرفان للشيخ على سعة صدرة في هذا الحوار الطيب.

اجرى هذا الحوارالاستاذ. سعد بن مطلق البويدي الخالدي

نقله كما هو علي آل محيميد الخالدي كما هو.من منتدى بني خالد الرسمي

Posted in: